पुणे: कोरोनाच्या रुग्णांवर प्रायोगिक तत्वावर प्लाझ्मा उपचाराबाबत प्रशासनाच्या वतीने प्रयत्न सुरु आहेत. कोरोनाच्या वाढत्या रुग्णसंख्येवर मात करण्याच्या दृष्टीने प्रतिबंधात्मक उपाय म्हणून ससून रुग्णालयाला उद्योजक अविनाश भोसले यांनी प्लाझ्मा फोरेसेस मशीन भेट दिली आहे, अशी माहिती विभागीय आयुक्त डॉ.दीपक म्हैसेकर यांनी सोमवारी दिली.
प्लाझ्मा फोरेसेस मशीन वापरण्यासाठी परवानगी देण्याबाबतचा प्रस्ताव आयसीएमआरकडे पाठविण्यात आला असून परवानगी प्राप्त झाल्यावर उपचार सुरु करण्याबाबतची कार्यवाही करण्यात येणार आहे. या मशिनव्दारे प्लाझ्मा वेगळा काढला जावू शकतो आणि हा प्लाझ्मा कोरोना रुग्णाच्या उपचारासाठी वापरला जावू शकतो. असा प्लाझ्मा 18 वर्षावरील पुरुष किंवा महिला व्यक्ती देवू शकते. तथापी संबंधित महिला अद्यापर्यंत गर्भवती राहिलेली नसावी. तसेच त्या व्यक्तीचे वजन 55 किलोपेक्षा जास्त असणे आवश्यक आहे.
प्लाझ्मा देणाऱ्या व्यक्तीच्या कोरोनाच्या शेवटच्या दोन्ही चाचण्या निगेटिव्ह असणे आवश्यक आहे. यानंतर 14 दिवसांनी संबंधित व्यक्ती कोरोनाच्या रुग्णाला प्लाझ्मा देवू शकतात. तथापी प्लाझ्मा डोनेट करण्यापूर्वी मागील 28 दिवसात या व्यक्तीमध्ये कोरोनाची कोणतीही लक्षणे आढळलेली नसावीत. संबंधित व्यक्ती हिपॅटायटिस- बी तसेच एचआयव्ही बाधित नसणे आवश्यक आहे. त्याचबरोबर रक्तदान करताना तपासणी करण्यात येणारा रक्तगट व आवश्यक त्या सर्व बाबींची काळजी देखील घेण्यात येईल असेही डॉ.म्हैसेकर यांनी सांगितले.