दानवे यांच्या मिश्किल भाषेतील टिकेला राष्ट्रवादी, काँग्रेसचे प्रत्युत्तर
मुंबई: सध्या राज्यात अमर, अकबर, अँथनी वरून चांगलाच सामना रंगला आहे. केंद्रीय राज्य मंत्री रावसाहेब दानवे यांनी आघाडी सरकारवर मिश्किल भाषेत केलेल्या टिकेला सत्ताधारी राष्ट्रवादी व काँग्रेसनेही अमर, अकबर, अँथनी या चित्रपटाचा धागा पकडून तशाच भाषेत चोख प्रत्युत्तर दिलं आहे. राज्यात अमर, अकबर आणि अँथनीच सरकार असून, या तिघांचे पायात पाय आहेत. आम्हाला पाडायचं नाही. त्यांचे तेच पडतील, असा टीका केंद्रीय राज्यमंत्री रावसाहेब दानवे यांनी राज्यातील महाविकास आघाडी सरकारवर केली होती. दानवे यांनी केलेल्या टीकेला आता राष्ट्रवादीपाठोपाठ काँग्रेसनंही प्रत्युत्तर दिलं आहे. “अमर, अकबर, अँथनी तिघेही रॉबर्ट शेठला पराभूत करतील” असा पलटवार काँग्रेसचे प्रदेश सरचिटणीस, प्रवक्ते सचिन सावंत यांनी भाजपावर केला आहे.
“महाराष्ट्रतील सरकार आम्हाला पाडायचं नाही. राज्यात अमर, अकबर आणि अँथनीचं सरकार असून, या तिघांचे पायात पाय आहेत. त्यामुळे त्यांचे तेच पडतील,” असं विधान केंद्रीय कृषी राज्यमंत्री रावसाहेब दानवे यांनी पुण्यात आयोजित पत्रकार परिषदेत केलं होतं. दानवे यांनी केलेल्या टीकेला काँग्रेसचे प्रदेश सरचिटणीस, प्रवक्ते सचिन सावंत यांनी उत्तर दिलं आहे. “अमर, अकबर, अँथनी तिघेही रॉबर्ट शेठला पराभूत करतील” असं म्हणत सावंत यांनी भाजपावर टीका केली आहे.
मोदी सरकारच्या कृषी कायद्यांमुळे छोट्या शेतकऱ्यांचे कल्याण होणार असल्यानेच काँग्रेस या विधेयकांना विरोध करत असल्याचं दानवे म्हणाले होते. “मुख्यमंत्री उद्धव ठाकरे यांनी वर्षभरापूर्वी शेतकर्‍यांच्या बांधावर जाऊन आमचं सरकार आल्यावर ५० हजार रुपये नुकसान भरपाई दिली जाईल, अशी घोषणा केली होती. आता त्याचं सरकार आलं आहे, तर त्यांनी शेतकऱ्यांना नुकसान भररपाई द्यावी,” अशी मागणी देखील दानवे यांनी केली होती.
होनी को अनहोनी कर दे.. अनहोनी को होनी…
“रावसाहेब दानवे म्हणाले महाराष्ट्र सरकार म्हणजे अमर-अकबर-अँथनी आहे. बरोबर आहे. कारण महाराष्ट्राच्या बदनामीचे त्यांचे प्रयत्न आम्ही हाणून पाडतो आणि कोरोना संकटातही राज्य प्रगतीपथावर नेतो. कारण – होनी को अनहोनी कर दे, अनहोनी को होनी, एक जगह जब जमा हो तीनो अमर, अकबर, अँथनी,” असं म्हणत राष्ट्रवादीचे नेते राज्याचे गृहमंत्री अनिल देशमुख यांनी दानवेंवर निशाणा साधला होता.