जालना: मराठा आरक्षण आंदोलनाने हिंसक रुप घेतल्याने संपूर्ण जालना आणि बीड जिल्ह्यात इंटरनेट सेवा बंद करण्यात आली. आरक्षणासाठी उपोषणाला बसलेले मनोज जरांगे यांची पत्रकार परिषद पार पडली. ही पत्रकार परिषद सुरू असतानाच इंटरनेट सेवा बंद करण्यात आली. परिस्थिती आणखी चिघळू नये, यासाठी खबरदारीचा उपाय म्हणून एअरटेल कंपनीने इंटरनेटची सेवा बंद केली. इतर कंपन्यांनीही हे पाऊल उचलले आहे. दरम्यान, नेटवर्क बंद केल्यामुळे संतप्त मोबाईल धारकांनी तीर्थपुरीतील (ता.घनसावंगी) जिओ टॉवर संध्याकाळी ९ वाजेच्या दरम्यान पेटवले.
जालना जिल्ह्यात ठिकठिकाणी मराठा आरक्षणासाठी आंदोलन सुरू आहे. जागोजागी टायर जाळून रस्ते अडवले जात आहेत. या पार्श्वभूमीवर मनोज जरांगे यांनी पत्रकार परिषद घेतली. यानंतर परिस्थिती आणखी चिघळू नये, यासाठी खबरदारीचा उपाय म्हणून एअरटेल कंपनीने आपली इंटरनेटची सेवा बंद केली. इंटरनेट सेवा बंद झाल्याचा मेसेज नागरिकांना मोबाईलवर आला आहे. त्याचप्रमाणे जिओ आणि इतर मोबाईल कंपन्यांकडूनही इंटरनेट सेवा बंद करण्यात आली आहे.
बीड जिल्ह्यात इंटरनेट बंद ठेवण्याचा निर्णय घेण्यात आला. या पार्श्वभूमीवर कुठलाही अनुचित प्रकार घडू नये, यासाठी प्रतिबंधात्मक उपाय म्हणून जालना जिल्ह्यात दोन दिवस इंटरनेट सेवा बंद ठेवण्याचा निर्णय राज्य सरकारने घेतला आहे.