हिंगोली: शहरासह जिल्ह्यात सहा ऑगस्टपासून कडक संचारबंदी लागू करण्यात आली आहे. मात्र, काहीजण दररोज आदर्श कॉलेज, रेल्वे स्टेशन रोड, नांदेड नाका या परिसरात माॅर्निंग वाॅकसाठी येत असतात. त्यांना वारंवार सांगूनही ऐकत नसल्याने अखेर बुधवार, 12 ऑगस्ट रोजी सकाळी शहर पोलीसांनी कारवाईचा बडगा उगारला. पोलीसी कारवाई पाहताच अनेक माॅर्निंग वाॅक करणाऱ्यांनी धूम ठोकली.
हिंगोली शहर पोलीसांनी आज सकाळी आदर्श कॉलेज परिसरामध्ये माॅर्निंग वाॅक करणाऱ्यांना अडवून कारवाई सुरू केली. पोलीसांची गाडी पाहताच काही माॅर्निंग वाॅक करणाऱ्यांनी पोबारा केला. शहर पोलीसांच्या वतीने सर्व नागरिकांना आवाहन करण्यात येते की, सध्या संचारबंदी लागू असल्याने कोणी विनाकारण घराच्या बाहेर पडू नका
नागरिकांनी स्वतःची काळजी घ्या, घरातच राहा, प्राणायाम करा, योगासने करा, स्वच्छता पाळा, मास्क वापरा, वेळोवेळी हात धुवा व स्वतः च्या तब्येतीची काळजी घ्या, असा सल्लाा शहर पोलीसांनी यावेळी नागरिकांना दिला.