नवी दिल्ली: माजी राष्ट्रपती ‘भारतरत्न’ प्रणव मुखर्जी यांचं निधन झालं आहे. ते 84 वर्षाचे होते. कोरोना आणि वाढत्या वयामुळं त्यांना 10 ऑगस्ट रोजी रूग्णालयात दाखल करण्यात आलं होतं. आपला कोरोनाचा रिपोर्ट पॉझिटिव्ह आल्याबाबत त्यांनी स्वतः ट्विट करून सांगितलं होतं आणि संपर्कात आलेल्यांना टेस्ट करून घेवून आयसोलेट होण्याबाबत देखील त्यांनी आवाहन केलं होतं.
यांच्या मेंदूवर 10 ऑगस्टला शस्त्रक्रिया करण्यात आली होती. त्यावेळी त्यांना व्हेंटिलेटरवर ठेवण्यात आले होते. शस्त्रक्रिया यशस्वी झाली. मात्र, व्हेंटिलेटर सपोर्ट कायम ठेवावा लागला होता. 11 ऑगस्ट रोजी हॉस्पिटलनं मुखर्जी यांची प्रकृती क्रिटिकल असल्याचं सांगत ते व्हेंटिलेटरवर असल्याचं स्पष्ट केलं होतं. प्रणव मुखर्जी हे दीर्घ कोमात गेल्याचं नंतर हॉस्पिटलनं सांगितलं. तेव्हापासून मुखर्जी यांची प्रकृती अत्यंत चिंताजनक होती. अखेर आज सोमवार, 31 ऑगस्ट रोजी त्यांचं निधन झालं आहे.
