समाजामध्ये तेढ निर्माण केल्याप्रकरणी दाखल गुन्ह्यांमध्ये अटक का करू नये? अशी विचारणा
मुंबई: रिपब्लिक टीव्हीचे संपादक अर्णब गोस्वामी यांच्याविरोधात मुंबई पोलिसांनी चॅप्टर प्रक्रिया सुरू केली आहे. अर्णब गोस्वामी यांना मुंबई पोलिसांनी कारणे दाखवा नोटीस बजावली असून ‘पूछता है भारत’ शो मध्ये समाजामध्ये तेढ निर्माण केल्याप्रकरणी दाखल गुन्ह्यांमध्ये अटक का करू नये? अशी विचारणा केली आहे.
पोलिसांनी बजावलेल्या नोटिशीवर अर्णब गोस्वामी यांना प्रक्षोभक वक्तव्य करणार नाही, असे लेखी बंधपत्र द्यावे लागणार आहे. तसेच १० लाख रुपये जामिनासाठी भरावे लागणार आहेत. जामीनदार अर्णब यांच्या वागणुकीवर नियंत्रण ठेवणारे हवेत, असेही नोटिशीत नमूद करण्यात आले आहे. वरळी न्यायालयाचे विशेष कार्यकारी दंडाधिकारी तथा सहायक पोलीस आयुक्त सुधीर जांबवडेकर यांनी क्रिमिनल प्रोसिजर कोड कलम ११ अन्वये ही नोटीस बजावली आहे. १६ ऑक्टोबर रोजी सायंकाळी ४ वाजता न्यायालयात समक्ष हजर हजर राहण्यासही त्यांना बजावण्यात आले आहे. ‘आपण प्रसारित करीत असलेल्या कार्यक्रमांमध्ये जातीय तणाव, धार्मिक द्वेष निर्माण होईल, अशी वक्तव्ये केली जात आहेत. त्यातून निरनिराळ्या गटांमध्ये शत्रुत्व वाढून एकोप्यास बाधा येण्याची शक्यता आहे. यातून सामाजिक शांतता आणि सुव्यवस्था धोक्यात येत आहे. आपणास जामिनाशिवय मोकळे सोडल्यास भविष्यात अशाच प्रकारचा किंवा इतर कोणत्याही प्रकारचा गुन्हा घडण्याची दाट शक्यता आहे. या सर्वाचा काळजीपूर्वक विचार करून आपल्याविरुद्ध खटला दाखल करून कार्यवाही चालू करण्यात आली आहे’, असे या नोटिशीत नमूद करण्यात आले आहे.
रिपब्लिक भारत या हिंदी वृत्तवाहिनीवरील ‘पूछता है भारत’ आणि रिपब्लिक टीव्ही या इंग्रजी वृत्तवाहिनीवरील ‘द डिबेट’ हे अर्णब गोस्वामी यांचे दोन प्राइम टाइम शो कचाट्यात सापडले आहेत. पालघरमधील साधूंच्या हत्येनंतर या शो च्या माध्यमातून अर्णब यांनी प्रक्षोभक वक्तव्ये केली होती. हिंदू-मुस्लिम समुदायात तेढ व द्वेष निर्माण करणारी ही विधाने असल्याचे नमूद करत याप्रकरणी नितीन राऊत यांनी ना.म. जोशी मार्ग पोलीस ठाण्यात तक्रार नोंदवली होती. त्याआधारे पोलिसांनी विविध कलमांखाली गुन्हा दाखल केला होता. त्या गुन्ह्याच्या अनुषंगानेच अर्णब गोस्वामी यांना नोटीस बजावण्यात आली आहे.