पुणे: पुण्याचे जिल्हा माहिती अधिकारी राजेंद्र सरग यांचा कोरोनामुळे मृत्यू झाला. त्यांच्यावर ससून रूग्णालयात उपचार सुरू होते. सरग यांना चांगले उपचार मिळावे यासाठी उपमुख्यमंत्री अजित पवार व जिल्हाधिकारी डाॅ.राजेश देशमुख यांनी खूप प्रयत्न केले, पण त्याच्या प्रयत्नांना यश आले नाही.
राजेंद्र सरग यांना मागील आठवड्यात कार्यालयात असतानाच त्रास होऊ लागल्याने कोरोना चाचणी करण्यात आली. त्याचा कोरोना चाचणीचा रिपोर्ट पाॅझिटिव्ह आल्यावर एका खाजगी हाॅस्पिटलमध्ये दाखल करण्यात आले. दोन दिवसांतच त्याची प्रकृती प्रचंड खालावल्याने त्यांना ससून रुग्णालयात हलविण्यात आले. ससूनमध्ये शनिवारी पहाटे उपचार सुरू असताना त्यांची प्राणज्योत मावळली. मनमिळावू अधिकारी म्हणून माध्यम क्षेत्र व प्रशासकीय क्षेत्रात त्यांचा नावलौकिक होता.
जिल्हाधिकारी डॉक्टर राजेश देशमुख यांना, सरग यांना कोरोना झाल्याचे समजाताच त्यांनी अनेक वेळा डॉक्टरांशी संपर्क साधून मदत करण्याच्या सूचना केल्या. मात्र, कोरोना पुढे जिल्हाधिकाऱ्यांचे प्रयत्न अपयशी ठरल्याने कोरोनाचे भयानक वास्तव समोर आले. सरग यांचा माध्यम क्षेत्रात दांडगा संपर्क होता. सामाजिक क्षेत्रातील कार्याबद्दल त्यांना अनेक पुरस्कारांनी गौरविण्यात आले होते. अवघ्या पंधरा दिवसांनी त्यांचे उपसंचालक या पदावर प्रमोशन होणार असल्याने हळहळ व्यक्त करण्यात येत आहे.