भाजपाचे १२ आमदार राष्ट्रवादी काँग्रेसमध्ये प्रवेश करणार
मुंबई: भाजपाचे ज्येष्ठ नेते एकनाथ खडसे राष्ट्रवादी काँग्रेस पक्षात शुक्रवारी दुपारी २ वाजता प्रवेश करणार असल्याची माहिती राष्ट्रवादी काँग्रेसचे प्रदेशाध्यक्ष तथा जलसंपदा मंत्री जयंत पाटील यांनी आज प्रदेश कार्यालयात पत्रकार परिषदेत दिली. दरम्यान, एकनाथ खडसे यांच्याबरोबर भाजपाचे १० ते १२ आमदार राष्ट्रवादी काँग्रेसमध्ये प्रवेश करणार असल्याचेही जयंत पाटील यांनी यावेळी सांगितले.
एकनाथ खडसे यांनी आज बुधवारी फोन करून भाजप पक्षाचा राजीनामा दिल्याचे सांगितले आहे. त्यामुळे त्यांचे राष्ट्रवादीत आम्ही स्वागत करत आहोत असेही जयंत पाटील म्हणाले. गेले कित्येक दिवस भाजपचे नेते एकनाथ खडसे राष्ट्रवादीत प्रवेश करणार असल्याची चर्चा होती ती चर्चा आज संपुष्टात आली असून आज राष्ट्रवादी काँग्रेसमध्ये प्रवेश करणार असल्याचे प्रदेशाध्यक्ष जयंत पाटील यांनी जाहीर केले. आता फक्त त्यांनाच प्रवेश दिला जाणार असून त्यांचे समर्थक येण्यास इच्छूक आहेत त्यांनाही काही दिवसात प्रवेश दिला जाईल, असेही जयंत पाटील यांनी स्पष्ट केले.
एकनाथ खडसे यांच्याबरोबर भाजपाचे १० ते १२ आमदार राष्ट्रवादी काँग्रेसमध्ये प्रवेश करणार असल्याचेही जलसंपदा मंत्री तथा राष्ट्रवादी काँग्रेसचे प्रदेशाध्यक्ष जयंत पाटील यांनी यावेळी सांगितले.
पाटील म्हणाले, खासगीत बऱ्याच जणांनी खडसेंबरोबर राष्ट्रवादीत यायची इच्छा व्यक्त केली आहे. जे खडसेंचे नेतृत्व मानतात ज्यांना राष्ट्रवादीत येण्यात काही अडचण नाही असे लोक राष्ट्रवादीत दाखल होतील. तसेच कोरोनाकाळात विधानसभेची निवडणूक घेणं परवडणार नाही त्यामुळे १० ते १२ आमदारांची घटनात्मक अडचण निर्माण होऊ नये म्हणून हे आमदार यथावकाश राष्ट्रवादीत प्रवेश करणार आहेत.